У межах акцыі “Ад усёй душы” першы сакратар РК ГА “БРСМ” Дар’я Козік і валанцёры сярэдняй школы №2 імя К.П.Арлоўскага наведалі ветэрана працы Зінаіду Кульша. Яны павіншавалі яе з навагоднімі і каляднымі святамі, а таксама расчысцілі двор ад снегу. Аб гэтым паведаміла Дар’я Козік.
Зінаіда Антонаўна была рада гасцям, дзякавала за ўвагу і клопат валанцёрам, якія часта наведваюць яе. Падзялілася набалелым і таксама выказала словы
ўдзячнасці сацыяльным работнікам, якія яе наведваюць і дапамагаюць па гаспадарцы.

Вучні сярэдняй школы №1 у межах акцый “Цуды на Раство” і “Ад усёй душы” наведалі пажылых людзей, дзяцей-інвалідаў. Павіншавалі іх са святамі, падарылі неабходныя дробязі, аказалі пасільную дапамогу. Калядныя сустрэчы і задушэўныя гутаркі пакінулі прыемныя ўражанні і ў гаспадароў, і ў наведвальнікаў.

Далучыліся да рэспубліканскай дабрачыннай акцыі і вучні Чыгірынскай сярэдняй школы. З віншаваннямі яны завіталі да пажылых людзей, аказалі ім пасільную дапамогу: пачысцілі дарожкі ад снегу, нанасілі вады, дроў. Аднавяскоўцы засталіся задаволенымі ўвагай да сябе.

Ад усёй душы з навагоднімі і каляднымі святамі работнікі Баравіцкага СДК і філіяла Баравіцкая сельская бібліятэка, а таксама спецыялісты РЦСАН павіншавалі пажылых людзей, якія жывуць на тэрыторыі Баравіцкага сельсавета, сярод іх – Сафія Міфодзьеўна Лапацінская. У рамках рэспубліканскай дабрачыннай акцыі «Ад усёй душы» былі падрыхтаваны музычныя віншаванні і падарункі.