Бронзавыя прызёры

7 мая, Кіраўск /Уласн.інф./. Абласная спартакіяда школьнікаў вызначыла мацнейшых футбалістаў Магілёўшчыны, сярод якіх і кіраўчане. 

Па выніках занальных спаборніцтваў, якія праходзілі ў Кіраўску, нашы футбалісты выйшлі ў фінал. У фінальнай стадыі яны прадэманстравалі добрую гульню, выйграўшы з лікам 9:2 у футбалістаў Магілёўскага раёна і 4:1 — у Клімавіч, а вось суседзям-бабруйчанам уступілі з лікам 0:2. 

У барацьбе за трэцяе месца нашы юнакі сустрэліся з асіповіцкімі футбалістамі. У асноўны час гульні была зафіксавана нулявая нічыя, у серыі ж пенальці дакладней былі кіраўчане. Яны і сталі бронзавымі прызёрамі спартакіяды. Серабро заваявалі бабруйчане, золата — у магілёўскіх футбалістаў.

Трэба адзначыць, што для нас гэта асаблівая перамога. Юныя футбалісты станавіліся прызёрамі ў шэрагу іншых спаборніцтваў, а вось у спартакіядзе школьнікаў за апошнія 46 гадоў такі поспех дасягнуты ўпершыню.