Члены БРСМ – навучэнцы Жыліцкага сельгаскаледжа дапамагаюць збіраць ураджай яблыкаў у КСУП «Чырвоны баец»

З ліку навучэнцаў Жыліцкага сельгаскаледжа – членаў раённай арганізацыі ГА “БРСМ” – сфарміраваны студэнцкі сельскагаспадарчы атрад імя двойчы Героя Савецкага Саюза Паўла Якаўлевіча Галавачова. Юнакі і дзяўчаты – усіх 15 чалавек – збіраюць ураджай яблыкаў на базе КСУП “Чырвоны баец”. Аб гэтым расказала першы сакратар раённага камітэта ГА «БРСМ» Ірына Пятроўская.

Курыруе іх работу выкладчык каледжа Станіслаў Масальскі, ён жа з’яўляецца і камандзірам атрада.

 Працоўная восень у саставе студатрада стартавала для рабят з 1 кастрычніка. Плануецца, што шчыраваць яны будуць да 15 кастрычніка.

Юнакі і дзяўчаты працуюць заўзята, з добрым настроем. У іх склалася дружная зладжаная каманда. Падбадзёрвае і сонечнае восеньскае надвор’е. Праца ў руках юных рупліўцаў спорыцца, нараканняў з боку кіраўніцтва сельгаспрадпрыемства няма.

Улічваючы тое, што члены атрада атрымліваюць у каледжы азы сельскагаспадарчых прафесій, яны з павагай ставяцца да працы на зямлі.

Шчыраваць адказна і добрасумленна, працаваць у камандзе, вучыцца зарабляць грошы, прыносіць карысць – гэтаму і вучацца члены студатрадаў. Радуе, што з кожным годам усё больш і больш рабят выказваюць жаданне ўступіць у рады студэнцкіх атрадаў і не падводзяць – старанна працуюць, весела праводзяць час і зарабляюць грошы.

Фота Аляксандра ХАХЛОВА.