18 сакавіка, Кіраўск /Уласн. інф./. 19 сакавіка 1906 года ўказам Мікалая II у класіфікацыю судоў марскога флоту быў уключаны новы разрад караблёў — падводныя лодкі. Гэты дзень прынята лічыць Днём маракоў-падводнікаў.
Беларусь — краіна сухапутная. Марскія і акіянскія шляхі пралягаюць вельмі далёка ад яе і нашай Кіраўшчыны, тым не менш, на тэрыторыі раёна пражывае нямала былых маракоў, у тым ліку і падводнікаў. Усе яны ў свой час, як і кіраўчанін В.М.Кальцоў, неслі службу ў марфлоце былога Савецкага Саюза. Але колькі б часу ні мінула, у сэрцы марака жыве любоў да акіянскай прасторы, салёнага ветру, сапраўднай мужчынскай дружбы, спаянай сумеснымі дальнімі паходамі на субмарынах.
У Валянціна Мікалаевіча, чалавека неардынарнага, з багатым жыццёвым вопытам, майстравітага, творчага, марская настальгія вылілася ў захапленне мадэліраваннем. Любімыя работы — канешне ж, падлодкі, ак гэта, якую на здымку трымае ў руках,— дакладная копія той, на якой хадзіў у час службы на Ціхаакіянскім флоце. Беражліва захоўвае В.М.Кальцоў і сваю вайсковую форму: яе па нашай просьбе апрануў напярэдадні свята — Дня марака-падводніка.