Не заставайцеся ўбаку!

28 студзеня, Кіраўск /Уласн. інф./. Напэўна, усе свядомыя людзі разумеюць, якія праблемы ўзнікаюць у грамадстве на глебе злоўжывання спіртнымі напіткамі. Гэта сапраўднае сацыяльнае зло, якое калечыць розум і свядомасць людзей, губіць іх здароўе і жыццё, разбурае сем’і, падштурхоўвае на злачынства. Як паведаміў начальнік аддзялення аховы правапардку і прафілактыкі РАУС М.А.Каранкевіч, з мэтай узмацнення барацьбы з п’янствам з 19 студзеня па 19 лютага ў раённым аддзеле ўнутраных спраў арганізавана “прамая лінія”. Любы жадаючы, каму неабыякава названая вышэй праблема, можа патэлефанаваць па нумары 24-2-27 і паведаміць звесткі аб няўдалых, на яго погляд, сем’ях, асобах, якія вядуць антыграмадскі лад жыцця, непаўналетніх, якія знаходзяцца ў сацыяльна небяспечным становішчы, альбо схільныя да ўчынення правапарушэнняў. Канфідэнцыяльнасць прадастаўленай інфармацыі гарантуецца. Не заставайцеся ўбаку ад барацьбы са злом і акажыце дапамогу міліцыі!