Рэдакцыя “Кіраўца” – у ліку ўзнагароджаных

У Мінску прайшоў рэспубліканскі семінар для прадстаўнікоў дзяржаўных сродкаў масавай інфармацыі “Маркетынг і новыя медыя”.

Звяртаючыся да ўдзельнікаў, міністр інфармацыі Уладзімір Пярцоў адзначыў, што беларуская журналістыка павінна працаваць на развіццё грамадства і дзяржавы. У інфармацыйнай прасторы, падкрэсліў ён, медыясфера з’яўляецца важнейшым фактарам канструявання, праектавання палітычных і сацыяльна-эканамічных рэалій. За апошнія некалькі год беларуская медыяпрастора кардынальным чынам змянілася. Карыстальнік звяртаецца да новых сродкаў камунікацыі, і СМІ павінны ісці за ім. Рэдакцыям таксама неабходна сканцэнтраваць свае намаганні на пошуку спосабаў асваення медыярынку.

На семінары выступілі прадстаўнікі Установы Адміністрацыі Прэзідэнта Рэспублікі Беларусь “Выдавецкі дом “Беларусь сёння”, УП “БелТА”, рэгіянальных СМІ, публіцысты, блогеры, вопытныя эксперты, супрацоўнікі  беларускай і расійскай медыясферы.

Рэспубліканскі семінар завяшыўся цырымоніяй узнагароджвання пераможцаў і лаўрэатаў конкурсу за высокапрафесійнае асвятленне пытанняў міжнацыянальных і міжканфесіяльных зносін, міжкультурнага дыялогу ў Рэспубліцы Беларусь і супрацоўніцтва з суайчыннікамі за мяжой. Сярод узнагароджаных Дыпломам Упаўнаважанага па справах рэлігій і нацыянальнасцей Рэспублікі Беларусь з уручэннем спецыяльнага прыза – установа “Рэдакцыя раённай газеты “Кіравец”.