“За любімую Беларусь!”

У раёне працягваюцца велазаезды ў межах раённай акцыі “За любімую Беларусь!”. Чарговы адбыўся ў аг.Жылічы.

У сонечны суботні дзень 12 верасня, на пляцоўцы перад мясцовым Домам культуры сабраліся вучні і настаўнікі Жыліцкага НПК ДС-СШ, навучэнцы і адміністрацыя Жыліцкага сельгаскаледжа, работнікі ўстаноў культуры, мясцовыя жыхары – усяго каля 70 чалавек, каб далучыцца да ўдзелу ў мерапрыемствах, якія праходзяць у межах падтрымкі міру і стабільнасці ў Беларусі.
Са словамі прывітання да сяльчан звярнулася старшыня Дабаснянскага сельвыканкама Галіна Шчур. Яна падзякавала ўсім за неабыякавасць да лёсу сваёй малой радзімы, за актыўную грамадзянскую пазіцыю, за клопат пра будучыню краіны.
Галіна Шчур нагадала аб мерапрыемствах, якія праводзіліся на тэрыторыі Дабаснянскага сельсавета ў межах Года малой радзімы, раённага свята працаўнікоў вёскі “Дажынкі” ў 2018 годзе. Былі добраўпарадкаваны не толькі аграгарадкі і вялікія вёскі, але і невялічкія населеныя пункты. Работы працягваюцца і зараз. Для гэтых мэт выдзяляюцца фінансы з раённага бюджэту, выкарыстоўваюцца сродкі самаабкладання.

Старшыня сельвыканкама заклікала моладзь шанаваць сваю малую радзіму, паважаць гісторыю беларускага народа, берагчы мір і незалежнасць Беларусі. Ад моладзі залежыць не толькі будучыня іх малой радзімы, але і краіны ў цэлым, адзначыла Галіна Шчур.
Свае музычныя нумары падарылі ўдзельнікам велазаезду і сяльчанам дырэктар Жыліцкай дзіцячай школы мастацтваў Кацярына Кісялёва, танцавальныя – малады спецыяліст установы Багдана-Елісава Коршунава.
Затым прыгожа расквечаная нацыянальнымі флагамі, беларускай сімволікай і паветранымі шарамі калона веласіпедыстаў рушыла па вуліцах аграгарадка Жылічы. Рабяты ўсклалі кветкі да брацкай магілы, ушанавалі памяць загінуўшых мінутай маўчання.
У в.Харлапавічы адбылася ўрачыстая перадача эстафеты раённай велаакцыі “За любімую Беларусь!” жыхарам аг.Добасна. Удзельнікаў велазаезда віталі вучні і настаўнікі Дабаснянскага НПК ДС-СШ, культработнікі мясцовага Дома культуры.
Патрыятычная акцыя ўпэўнена крочыць па аграгарадках і вёсках раёна, сімвалізуючы яднанне кіраўчан у любові да сваёй любімай Беларусі.