Няхай да кожнага завітае цуд: старшыня Кіраўскага райвыканкама Галіна Слабоднікава наведала цэнтр карэкцыйна-развіваючага навучання і рэабілітацыі

У межах рэспубліканскай дабрачыннай акцыі “Нашы дзеці” старшыня райвыканкама Галіна Слабоднікава разам з намеснікам старшыні райвыканкама Таццянай Бяляўскай напярэдадні самага чароўнага і любімага зімовага свята – Новага года – завіталі да выхаванцаў раённага цэнтра карэкцыйна-развіваючага навучання і рэабілітацыі.

Разам з рабятамі і іх выхавальнікамі ганаровых гасцей віталі Дзед Мароз і Снягурка. Яны запрасілі ўдзельнікаў ранішніка ўзяцца за рукі і закруціцца ў святочным карагодзе вакол прыгажуні-ёлкі. Атмасфера казкі і дабрыні, чаканне цудаў аб’ядналі дзяцей і дарослых і падарылі ім радасны, узнёслы настрой.
Самым яскравым момантам стала, вядома ж, уручэнне падарункаў. Кожны выхаванец атрымаў салодкія сюрпрызы, цацкі і развіваючыя гульні. Калектыву цэнтра ў якасці падарунка Галіна Слабоднікава ўручыла ноўтбук, які перадала дырэктару ЦКРНіР Алене Каранкевіч. Звяртаючыся да прысутных, старшыня райвыканкама падзякавала за іх высакародную справу, адзначыўшы яе важнасць і неабходнасць для бацькоў выхаванцаў і для грамадства. Павіншавала дзяцей і дарослых з надыходзячымі святамі, пажадала ўсім мацнейшага здароўя, поспехаў і каб у гэтыя чароўныя дні да кожнага абавязкова завітаў цуд!
На памяць аб цёплай пераднавагодняй сустрэчы зрабілі агульны фотаздымак.
Яўгенія БЯЛЬКО.
Фота Максіма МІКЕШЫНА.