Добраўпарадкаванню — належную ўвагу!

25 кастрычніка, Кіраўск /Уласн. інф./ Не спыняюцца маштабныя работы па добраўпарадкаванні, навядзенні санітарнай чысціні і паляпшэнні эстэтычнага выгляду нашага горада. І мінулая пятніца стала гэтаму найлепшым пацверджаннем.

Плённа працавалі на розных участках і аб’ектах добраўпарадкавання прадстаўніікі працоўных калектываў устаноў і арганізацый горада, індывідуальныя прадпрымальнікі. Апошнія разам з работнікамі райвыканкама ўстанаўлівалі агароджу на гарадскім рынку з боку вул. Савецкай.

Работнікі аптэкі і аддзела адукацыі райвыканкама добраўпарадкоўвалі тэрыторыю вакол будынка раённай аптэкі, фарбавалі плот, ДЮСШ — займаліся рамонтам плоту па вул.Калініна, УКП “Жылкамгас” — рамонтам ганку інтэрната па вул. Пушкінскай. Работнікі райвыканкама таксама займаліся рамонтам ганку свайго адміністрацыйнага будынка і добраўпарадкаваннем прылягаючай да яго тэрыторыі.

Усе намаганні працоўных калектываў устаноў, арганізацый і прадпрыемстваў горада на чале з райвыканкамамі, правядзенне значных работ па добраўпарадкаванні маюць адзіную мэту: каб наш райцэнтр быў прыгожым, квітнеючым, утульным і камфортным для пражывання, а госці горада па-добраму зайздросцілі кіраўчанам.

У сувязі з усім вышэйсказаным не лішнім будзе нагадаць жыхарам горада, што не варта займаць пазіцыю назіральнікаў, трэба больш актыўна ўключацца ў агульныя работы па добраўпарадкаванні, пакуль гэтаму спрыяе надвор’е, у прыватнасці, прывесці ў парадак агароджы прысядзібных участкаў, падрамантаваць і пафарбаваць іх. Балазе, зараз на гэта выслабаніўся вольны час: практычна закончаны агародніцкія клопаты.